ustad-e-mohtaram ko mera salam kahna

kitni mohabbaton se pahla sabaq padhaya
main kuchh na jaanta tha sab kuchh mujhe sikhaya
an-padh tha aur jahil qabil mujhe banaya
duniya-e-ilm-o-danish ka rasta dikhaya


ai dosto milen to bas ek payam kahna
ustad-e-mohtaram ko mera salam kahna
mujh ko khabar nahin thi aaya hun main kahan se
man bap is zamin par lae the aasman se


pahuncha diya falak tak ustad ne yahan se
waqif na tha zara bhi itne bade jahan se
mujh ko dilaya kitna achchha maqam kahna
ustad-e-mohtaram ko mera salam kahna


jine ka fan sikhaya marne ka bankpan bhi
izzat ke gur batae ruswai ke chalan bhi
kante bhi rah mein hain phulon ki anjuman bhi
tum fakhr-e-qaum banna aur nazish-e-watan bhi


hai yaad mujh ko un ka ek ek kalam kahna
ustad-e-mohtaram ko mera salam kahna
jo ilm ka alam hai ustad ki ata hai
hathon mein jo qalam hai ustad ki ata hai


jo fikr-e-taza-dam hai ustad ki ata hai
jo kuchh kiya raqam hai ustad ki ata hai
un ki ata se chamka 'hatib' ka nam kahna
ustad-e-mohtaram ko mera salam kahna