یوں ہراساں اس کا دل ہے دوستوں کے درمیاں

یوں ہراساں اس کا دل ہے دوستوں کے درمیاں
رات جیسے ہو گئی ہو دشمنوں کے درمیاں
اس اندھیری رات میں جگنو نظر آتے نہیں
چاند اوجھل ہو گیا ہے بادلوں کے درمیاں


سنگ دل ہیں سب یہاں پر ہم کسے اپنا کہیں
بزم میں تنہا سا ہوں میں نفرتوں کے درمیاں
رخ سے پردا جب اٹھا تو سب حقیقت کھل گئی
چاند سا مکھڑا بھی اک ہے ظالموں کے درمیاں


ہوشمندی ہے ضروری موسموں کو دیکھ کر
کچھ بھنور بھی اڑ رہے ہیں تتلیوں کے درمیاں
دیکھ لو تقدیر بھی ناکام ہو کر رہ گئی
آج ناصح آ پھنسا ہے حاجیوں کے درمیاں


جام مے مینا ہے آتشؔ ساتھ میں ہے ساقیا
اب نہ کوئی آئے بس ان مستیوں کے درمیاں