وصل بھرپور رہا ہجر بھی بھرپور بنا

وصل بھرپور رہا ہجر بھی بھرپور بنا
زخم ناخن سے کھرچتے ہوئے ناسور بنا
اس نے اک عمر مرے ساتھ اذیت جھیلی
اب کے سائے کو مرے جسم سے کچھ دور بنا


آنکھ بے نور سہی کان تو سن سکتے ہیں
ایسا کچھ بول مری آنکھ کو پر نور بنا
میرے لہجے کو چرا کر ہوا نامی کوئی
میرے اشعار چرا کر کوئی مشہور بنا


میری سچائی بیاں کر مرے اشعار کے ساتھ
میری تصویر بنا اور بدستور بنا
میں تو شاعر تھا مگر پیٹ کی خاطر عارفؔ
بار غم سہہ نہ سکا بندۂ مزدور بنا