سہارا میں نہیں بنتا اگر اداسی کا

سہارا میں نہیں بنتا اگر اداسی کا
ٹھکانہ ہوتا کہاں اور کدھر اداسی کا
وبائی شکل بنا لی ہے اس مرض نے اب
شکار ہونے لگا ہر بشر اداسی کا


بلا سبب بھی کبھی دل اداس ہوتا ہے
کوئی جواز نہیں ہوتا ہر اداسی کا
ہر ایک موڑ سے رستہ نیا نکلتا ہے
تمام ہوتا نہیں ہے سفر اداسی کا


میں تیری چارہ گری کو سلام کرتا ہوں
مگر علاج نہیں چارہ گر اداسی کا
بس ایک بار اسے میں نے اداس دیکھا تھا
ہے آج تک مرے دل پر اثر اداسی کا


خوشی کا اپنا مزہ جو ہے سو ہے اپنی جگہ
مزہ اک اپنا الگ ہے مگر اداسی کا
درون خانہ بھی وہ ہے برون خانہ بھی
کمالؔ گھر ہے تمہارا کہ گھر اداسی کا