نہ اس کی یاد جاتی ہے نہ اس کا غم نکلتا ہے

نہ اس کی یاد جاتی ہے نہ اس کا غم نکلتا ہے
کچھ ایسی دل کی حالت ہے کہ میرا دم نکلتا ہے
اچھل کر ہمسری کی کوششیں کرتے ہیں وہ لیکن
ہمارے قد سے ان کا قد ہمیشہ کم نکلتا ہے


یہاں چہرے ہیں یاروں کے مگر دل دشمنوں کے ہیں
یہاں امرت کے پیالے سے بھی اکثر سم نکلتا ہے
تری چارہ گری کی چارہ گر حاجت نہیں ہم کو
ہمارے زخم سے ہی زخم کا مرہم نکلتا ہے


بدن پر جتنے گھاؤ تھے وہ سارے بھر گئے لیکن
جو دل کے زخم ہیں ان سے لہو پیہم نکلتا ہے
یہ میزائل کی دنیا ہے نہ دنگل ہے نہ رن کوئی
لڑائی ہو تو اب گھر سے کہاں رستم نکلتا ہے


حسیں چہروں کی محفل میں دل اپنا لے کے مت جاؤ
چمکتی دھوپ میں لے کر کوئی شبنم نکلتا ہے