مطمئن بھی کس قدر تھے اپنی قربانی سے ہم

مطمئن بھی کس قدر تھے اپنی قربانی سے ہم
رد کئے جانے لگے اب کتنی آسانی سے ہم
آنسوؤں کی آگ نے سورج بنا ڈالا ہمیں
بجھ نہیں سکتے سمندر اب ترے پانی سے ہم


اتنی عادت پڑ چکی مشکل پسندی کی ہمیں
خود سے بھی اب مل نہیں پاتے ہیں آسانی سے ہم
زندگی کو دیکھنے کی آرزو میں یوں ہوا
آئنے کو دیکھتے رہتے ہیں حیرانی سے ہم


آج ہم اترے ہوئے دریا سے ڈرتے ہیں رئیسؔ
کھیلتے تھے کل تلک موجوں کی طغیانی سے ہم