محبت کی یہ ہوتی ہے سزا کیا

محبت کی یہ ہوتی ہے سزا کیا
لہو بہتا ہے آنکھوں سے سدا کیا
زباں خاموش تھی فرط ادب سے
تمہارے سامنے میں بولتا کیا


ہمیشہ ساتھ ہے جس کے تو یارب
غرض ہو اس کو دنیا سے بھلا کیا
ملاتا ہی نہیں نظریں وہ مجھ سے
خود اپنی ہی نظر سے گر گیا کیا


خموشی چیختی ہے ذہن میں کیوں
کوئی آنے کو ہے اب زلزلہ کیا
مجھے ہی ملتے ہیں کیوں غم یہ آخر
انہیں معلوم ہے میرا پتہ کیا


بہکتے ہیں قدم ابرارؔ تیرے
کسی سے عشق تجھ کو ہو گیا کیا