کچلا کیے ہیں کتنے ہی لشکر زمین کو

کچلا کیے ہیں کتنے ہی لشکر زمین کو
ایسے کیا گیا ہے برابر زمین کو
میں نے بھی سیر کی ہے کبھی آسمان کی
میں جانتا ہوں دشت سمندر زمین کو


پیروں سے دھیرے دھیرے کھسکنے لگی ہے اب
کب تک رکھوں میں یار پکڑ کر زمین کو
جب بھی تھکن سے چور ہوا سو گیا ہوں میں
چادر فلک کو مان کے بستر زمین کو


مجھ کو لباس روح الگ سے عطا ہوا
دفنا دیا گیا مرے اندر زمین کو
پاتال میں پڑا ہوں مگر پر سکون ہوں
میں جھانکتا رہا ہوں اچھل کر زمین کو


دلدل کو پار کرنا ہے عارفؔ اور اس کے بعد
رکھ دیں گے تیرے سامنے لا کر زمین کو