کھلتا ہے کسی پر تو کسی پر نہیں کھلتا

کھلتا ہے کسی پر تو کسی پر نہیں کھلتا
ہمراز عجب ہے کہ ہمی پر نہیں کھلتا
تم ساتھ ہو میرے کہ مرے ساتھ نہیں ہو
یہ کیسا اضافہ ہے کمی پر نہیں کھلتا


اک آہ بھی ہوتی ہے پس ضبط و پس لب
خاموش پڑے رہنا سبھی پر نہیں کھلتا
ہونے کا گماں ہے کہ نہ ہونے کا یقیں ہے
اوروں پہ تو کھلتا ہے مجھی پر نہیں کھلتا


گریے کی سہولت جو کھلی ہے تو کھلا ہے
غم کس پہ کھلے وہ جو غمی پر نہیں کھلتا
کھلنے کی کہانی کا در و بست بھی از خود
جو پھول پہ کھلتا ہے کلی پر نہیں کھلتا


سرمستی و سرشاری و سرافرازی کھلے کیا
جب میرے تخیل کا کوئی پر نہیں کھلتا