عشق ہے ہم سے تو یہ وہم گماں کیسے ہیں

عشق ہے ہم سے تو یہ وہم گماں کیسے ہیں
پھر گلے شکوہ بتا زیر زباں کیسے ہیں
تم تو کہتے تھے کہ سب سوکھ گئے ہیں لیکن
پھر ہمیں دیکھ کے یہ اشک رواں کیسے ہیں


جب رقیبوں سے نہیں ہے کوئی رشتہ تو بتا
راہ میں پھر ترے قدموں کے نشاں کیسے ہیں
کون زندان میں اب مجھ کو بتائے آ کر
دوست کیسے ہیں مرے دشمن جاں کیسے ہیں


نکتہ چینی جو کیا کرتے تھے ہر بات پہ وہ
شہر کے میرے سبھی اہل زباں کیسے ہیں
فکر اس کو ہے بہت میری خبر ہے مجھ کو
تم نہ کر دینا بیاں جا کے وہاں کیسے ہیں


یہ نہ کہنا کہ تڑپتے ہیں تری یادوں میں
وہ اگر پوچھے کہ ابرارؔ میاں کیسے ہیں