ہم کو ہوا تھا عشق جوانی میں مختصر

ہم کو ہوا تھا عشق جوانی میں مختصر
کردار تھا ہمارا کہانی میں مختصر
مت پوچھ رات کتنی اذیت گزار تھی
ملنا تھا اس سے شام سہانی میں مختصر


تفصیلی گفتگو کا تھا موضوع پر وہ شخص
جو کہہ گیا ہے بات روانی میں مختصر
سورج مکھی کا پھول تھا ناراض شام تک
میں کھو گیا تھا رات کی رانی میں مختصر


بہروپ دوستوں کا عیاں ہم پہ ہو گیا
دیکھا نشانہ ہم نے نشانی میں مختصر
اعمال نیک و بد کی ہمیں کیا خبر میاں
ہم رہ رہے ہیں کوچۂ فانی میں مختصر


احوال لکھ کے آپ ہمیں بھیج دیجیے
عارف نظیرؔ مصرع ثانی میں مختصر