ہماری آنکھ اداسی سے لال کب تک ہو

ہماری آنکھ اداسی سے لال کب تک ہو
تمہارے جانے کا آخر ملال کب تک ہو
کسی بھی روز امڈ آئے گی یہ بیزاری
بتاؤ اتنا زیادہ خیال کب تک ہو


تغیرات زمانہ ہے لطف لیتے رہو
ہماری بات یوںہی حسب حال کب تک ہو
ہٹا رہے ہیں تعلق پہ جو جمی ہے گرد
وہ رابطوں کا تسلسل بحال کب تک ہو


اداسی اور کہیں بھی ہمیں بلاتی ہے
بس اک جگہ پہ مسلسل دھمال کب تک ہو
ملے گا اینٹ کا ان کو جواب پتھر سے
میں منتظر ہوں کہ عارفؔ سوال کب تک ہو