دنیا کا میں غلام ابھی تک نہیں ہوا

دنیا کا میں غلام ابھی تک نہیں ہوا
پنچھی یہ زیر دام ابھی تک نہیں ہوا
برسوں سے کہہ رہا ہوں بھلا دے اسے اے دل
چھوٹا سا ایک کام ابھی تک نہیں ہوا


رستہ بھی ختم ہو گیا منزل بھی مل گئی
لیکن سفر تمام ابھی تک نہیں ہوا
دیوانوں میں شمار تو ہونے لگا مرا
دیوانگی میں نام ابھی تک نہیں ہوا


ہم دونوں ایک دوجے کے آ تو گئے قریب
پر فاصلہ تمام ابھی تک نہیں ہوا
دنیا سے کرتا رہتا ہوں ہر وقت گفتگو
خود سے میں ہم کلام ابھی تک نہیں ہوا


خرگوش اب کے سوئے ضروری نہیں کمالؔ
کچھوا تو تیز گام ابھی تک نہیں ہوا