دل ربا مجھ کو تری مجبوریاں اچھی لگیں

دل ربا مجھ کو تری مجبوریاں اچھی لگیں
عشق جب حد سے بڑھا تو دوریاں اچھی لگیں
اس نے پہلے رات دن ہی خوب تڑپایا مجھے
سامنے جب آ گیا تو شوخیاں اچھی لگیں


دھوپ کی شدت میں سارا دن گزارا ہے مگر
مجھ کو محنت سے ملی دو روٹیاں اچھی لگیں
دیکھ کر مجھ کو پریشاں جن کو ملتی ہے خوشی
میرے پیروں میں پڑیں یہ بیڑیاں اچھی لگیں


حال دل میں نے سنایا اس کو راحت مل گئی
لمحہ لمحہ اس کو میری سسکیاں اچھی لگیں
آگ کے لاوے میں آتشؔ جل رہی تھیں جھگیاں
حکمرانوں کو بھی اس دم کرسیاں اچھی لگیں