چوکھٹ پہ کہ رستے پہ رکھو میری بلا سے

چوکھٹ پہ کہ رستے پہ رکھو میری بلا سے
میرا وہ دیا ہے نہیں ڈرتا جو ہوا سے
یہ جرم محبت میں نے دانستہ کیا ہے
دنیا سے کہو مجھ کو ڈرائے نہ سزا سے


یہ میرے ستم گر کا کرم کم تو نہیں ہے
میں آہ جو بھرتا ہوں تو دیتا ہے دلاسے
اس شہر میں بستے ہیں جو بہرے ہیں کہ مردے
اب در نہیں کھلتا ہے کوئی آہ و بکا سے


کچھ لوگوں نے مل جل کے کنواں کھود لیا ہے
کچھ لوگ ابھی منتیں کرتے ہیں گھٹا سے
دریا کی سخاوت کا بھرم کھلنے لگا ہے
کچھ لوگ ہیں سیراب تو کچھ لوگ ہیں پیاسے


بیمار نے اس بار یہی قصد کیا ہے
وہ ٹھیک نہیں ہوگا دوا سے نہ دعا سے