چاروں طرف ہے پھیلی ہوئی تیرگی تو کیا

چاروں طرف ہے پھیلی ہوئی تیرگی تو کیا
آتی نہیں ہے گھر میں مرے روشنی تو کیا
ہر روز ضرب دیتے ہیں اپنے نفس کو ہم
لیکن یہ چھوڑتا ہی نہیں کافری تو کیا


مسجد میں کی نماز ادا پھر پیے دو جام
نیکی کے ساتھ ساتھ ہے تھوڑی بدی تو کیا
اے ساقیا میں جلد ہی بدلوں گا میکدہ
بجھتی نہیں ہے میری یہاں تشنگی تو کیا


اتنا بھی کم ہے کیا کہ کیا اس نے کچھ کلام
کہنے کی تھی جو بات نہیں بھی کہی تو کیا
جو چل رہا ہے چلنے دو ان کو نہیں خیال
مردہ ضمیر قوم کبھی مر گئی تو کیا