اپنے دل پر ہی نہیں ہے مجھے قابو بولو

اپنے دل پر ہی نہیں ہے مجھے قابو بولو
تم نے کر تو نہیں رکھا کوئی جادو بولو
جتنی پیاری تری آنکھیں ہیں ترا لہجہ ہے
صرف اتنا ہی کہوں گا تجھے اردو بولو


دل جگر جس سے ہو گھائل یہ وہی آلہ ہے
اپنی نظروں کو نظر تم نہیں چاقو بولو
اب وہ تہذیب و تمدن کہیں مدفون ہوئی
اس سلیقے سے مری جان نہ اردو بولو


اپنے دامن میں سمو لیتے ہو جس کو عارفؔ
وہ لہو ہوتا ہے دل کا مگر آنسو بولو