اے زندگی بس اور نہیں بس سکت نہیں

اے زندگی بس اور نہیں بس سکت نہیں
اس دل کو سنگ راہ کی صورت برت نہیں
رک جائے نبض فکر کے رکتے ہی کائنات
اب تک تو میری خاک میں ایسی صفت نہیں


بھرتی کا ایک میں ہی بچا تھا نکل گیا
اب تیرا شعر صاف ہے کوئی بھرت نہیں
کیوں نقد بیچنے پہ بضد ہو تم اپنی بات
حالانکہ اب ادھار میں اس کی کھپت نہیں


اب سوچنے لگا ہوں بڑھا دوں دکان شوق
فی الوقت ایسے کام میں کوئی بچت نہیں
ناد علی کے ورد کو تار نفس سے جوڑ
اب زندگی گزار مری جاں بھگت نہیں