اب میں خود کو یاد آنا چھوڑ دوں

اب میں خود کو یاد آنا چھوڑ دوں
ہاں یہ کار احمقانہ چھوڑ دوں
درد لکھنا چھوڑ دوں کیسے بھلا
عمر بھر کا محنتانہ چھوڑ دوں


دام و صیاد و قفس کے خوف سے
کیا تلاش آب و دانہ چھوڑ دوں
آخرش اس بات سے کیا لوں مراد
تم جو کہتے ہو زمانہ چھوڑ دوں


یاد آنا چھوڑ دو تم بھی مجھے
میں تمہیں بھی یاد آنا چھوڑ دوں
یا تو کھل کے بول دوں یا چپ رہوں
زیر لب یوں بڑبڑانا چھوڑ دوں


باعث رنج و الم ہیں محفلیں
سوچتا ہوں آنا جانا چھوڑ دوں