زیست کی شام تلک تیری طلب

زیست کی شام تلک تیری طلب
صبح ہنگام تلک تیری طلب
شام سے صبح تلک تیرا خیال
صبح سے شام تلک تیری طلب


گاؤں سے شہر تلک خط کا سفر
تیرے ہم نام تلک تیری طلب
مصر سے شام تلک پا بہ رکاب
شہر اصنام تلک تیری طلب


عشق کی آخری معراج ہے تو
شعر و الہام تلک تیری طلب
چشم عشاق کو پھرتی ہے لیے
بام سے بام تلک تیری طلب


شہر تقدیس سے لے آئی مجھے
شہر اوہام تلک تیری طلب
عشق گرچہ ہے قبیلہ میں حرام
اپنے انجام تلک تیری طلب