یوں تو سب کے لیے کیا کیا نہ اشارے نکلے

یوں تو سب کے لیے کیا کیا نہ اشارے نکلے
مرے حصے میں تو اب کے بھی خسارے نکلے
مجھ میں اک روز کوئی قتل ہوا تھا اور پھر
مری آنکھوں سے بہت خون کے دھارے نکلے


اپنے جیسی کوئی تصویر بنانی تھی مجھے
مرے اندر سے سبھی رنگ تمہارے نکلے
میں نے سمجھا تھا کہ نم خوردہ ہے میری مٹی
چھو کے دیکھا تو تہ خاک شرارے نکلے


اہل دنیا سے کوئی جنگ تھی در پیش ہمیں
ہم بھی کیا لوگ تھے خوابوں کے سہارے نکلے
لوٹ کر آ گئے صحرا کی طرف آخر کار
سب ترے شہر میں تنہائی کے مارے نکلے


میں نے محسوس کیا ہی تھا تجھے آج کی شام
رات جب آئی تو پلکوں پہ ستارے نکلے