یہ کیسا شہر کا منظر دکھائی دیتا ہے

یہ کیسا شہر کا منظر دکھائی دیتا ہے
ہر ایک ہاتھ میں پتھر دکھائی دیتا ہے
یہ کس گناہ کی پاداش پا رہے ہیں ہم
جو گردشوں میں مقدر دکھائی دیتا ہے


کسی نے پیار سے کر لی ہے گفتگو شاید
جو اس کا چہرہ منور دکھائی دیتا ہے
کبھی شراب کو بھی جو حرام کہتا تھا
اب اس کے ہاتھ میں ساغر دکھائی دیتا ہے


وفا کا عہد نبھانے کی کیا قسم کھائی
وہ چہرہ آج گل تر دکھائی دیتا ہے
ڈبا سکا نہ مرے آج یہ سفینے کو
تو بے قرار سمندر دکھائی دیتا ہے


اداسیوں کو یہاں کون رکھ گیا رضوانؔ
فسردہ اب جو ہر اک گھر دکھائی دیتا ہے