اس کو بھی کسی روز مرا دھیان رہے گا

اس کو بھی کسی روز مرا دھیان رہے گا
زندہ جو رہوں گا تو یہ امکان رہے گا
جس لفظ سے پھوٹے گی ترے درد کی خوشبو
وہ لفظ مرے شعر کی پہچان رہے گا


اچھا ہی ہوا خود کو بھی اب بھول گئے ہیں
ہم پر تری یادوں کا یہ احسان رہے گا
کچھ روز ابھی جشن ہوا ہوگا یہاں بھی
کچھ روز ابھی گرد کا طوفان رہے گا


ہم کتنا ہی بہلائیں نہیں بہلے گا یہ دل
ہم کتنا ہی سمجھائیں پریشان رہے گا
ہاں اہل جہاں خاک اڑاتے ہی رہیں گے
جب تک مری وحشت کا بیابان رہے گا


ہم دیکھ کے اس شخص کو انجان بنیں گے
وہ شخص ہمیں دیکھ کے حیران رہے گا