ٹلنے کا یوں فقیر نہیں ہے یہ عشق ہے

ٹلنے کا یوں فقیر نہیں ہے یہ عشق ہے
یہ جو نئی غزل کی زمیں ہے یہ عشق ہے
دنیا میں کتنا حسن ہے مجھ کو نہیں پتہ
واللہ گر ذرا بھی کہیں ہے یہ عشق ہے


میں اس جہاں کا سب سے امیر آدمی ہوں یار
تم نے بنا دیا ہے یقیں ہے یہ عشق ہے
مغرور جس کو تو نے کہا تھا وہ مر چکا
قدموں میں دیکھ کس کی جبیں ہے یہ عشق ہے


ہم زاد ہے ازل سے مرا روح کائنات
یہ میں ہوں دوسرا جو مکیں ہے یہ عشق ہے
کل جو ملا تھا میں ہوں وہی بوریا نشیں
دنیا تمام زیر نگیں ہے یہ عشق ہے


اس شخص کو یقین دلائیں تو کس طرح
ہر شخص کو اگرچہ یقیں ہے یہ عشق ہے