صحراؤں میں خاک اڑائی صورت مجنوں والی کی

صحراؤں میں خاک اڑائی صورت مجنوں والی کی
متنبی کو سامنے رکھا نظمیں پڑھی ہیں حالیؔ کی
اونٹوں کو بھی لے آیا اقبالؔ کے ساقی نامہ تک
یعنی مجھ سے چرواہے نے اردو کی رکھوالی کی


خیمہ اٹھائے صحرا صحرا شاید یوں پھرتا نہ کبھی
خانہ بدوشن سن لیتی گر یارو بات سوالی کی
آس کی پریاں قصر دل کی چھت پر آنا بھول گئیں
جب سے خواب میں صورت دیکھی سندھی اجرک والی کی


میرؔ کی تربت پر غزلوں نے رو رو رکھ دیں اپنی چھب
مقطع ٹانکنے والوں نے جب حد کر دی بدحالی کی
نارا ناگ کی وادی میں اک برہن گائے ہجر کا راگ
ٹھہر ذرا اے خانہ بدوشاؔ سوجھ ہے گر سنتھالی کی