سب یار مرے خوب کمانے میں لگے تھے

سب یار مرے خوب کمانے میں لگے تھے
ہم پچھلی کمائی کو لٹانے میں لگے تھے
وہ چھت بھی گئی سر سے جو دنیا تھی ہماری
ہم کون سی دنیا کو بچانے میں لگے تھے


رونے کو جنہیں آج سجائی ہے یہ محفل
اچھے وہ کسی اور زمانہ میں لگے تھے
کس سچ کا انہیں سامنا کرنے سے تھا انکار
کیوں لوگ مرا جھوٹ چھپانے میں لگے تھے


معصوم تھے اتنے کہ جدا ہونے کے دن بھی
پھولوں سے ترے گھر کو سجانے میں لگے تھے
بیٹھے تھے سبھی دل کے دریچوں کو کیے بند
اور گھر کو ہوا دار بنانے میں لگے تھے


میں کس کو وہاں قید کی روداد سناتا
سب اپنے گرفتار گنانے میں لگے تھے