نظر کے زاویے اکثر ملا کے دیکھے ہیں

نظر کے زاویے اکثر ملا کے دیکھے ہیں
انہیں بھی حسن کے جلوے دکھا کے دیکھے ہیں
جو آگ تم نے لگائی وہ بجھ نہیں سکتی
غم فراق میں آنسو بہا کے دیکھے ہیں


ہمارا عشق غم دل کا آئنہ نکلا
نگاہ حسن سے پردے اٹھا کے دیکھے ہیں
ہزار بار رقیبوں نے رہگزر میں تری
نقوش پائے محبت مٹا کے دیکھے ہیں


کچھ اس طرح سے محبت کی بات کرتے ہو
نہ جانے کتنے ہی دل میں بسا کے دیکھے ہیں
ہماری خواب گرانی تو کچھ نہیں ہوتی
حسین خواب بھی خود کو جگا کے دیکھے ہیں


کسی کی راہ محبت میں آج تک قیصرؔ
چراغ ہائے تمنا جلا کے دیکھے ہیں