ننھے ہاتھوں میں کٹورا نہیں دیکھا جاتا

ننھے ہاتھوں میں کٹورا نہیں دیکھا جاتا
ہم سے غربت یہ تماشا نہیں دیکھا جاتا
حاکم وقت بتا کیسے گزاریں شب و روز
ہر طرف خوف کا پہرا نہیں دیکھا جاتا


دوستوں حق کے لیے ہو کے انا کی خاطر
جنگ میں اپنا پرایا نہیں دیکھا جاتا
اس لیے علم کی شمعوں کو جلاتے ہیں ہم
شہر کا ہم سے اندھیرا نہیں دیکھا جاتا


کبھی اک ڈوبنے والے کی سنی تھیں چیخیں
ہم سے اب جانب دریا نہیں دیکھا جاتا
یک بہ یک جیسے بدل جاتا ہے موسم رضواںؔ
اس طرح اس کا بدلنا نہیں دیکھا جاتا