نام تمہارا بھول گئے ہم

نام تمہارا بھول گئے ہم
دیکھو کیا کیا بھول گئے ہم
مڑ کر ایسے دیکھا اس نے
پیچھا کرنا بھول گئے ہم


آہ تخیل کی وہ اڑانیں
پیروں چلنا بھول گئے ہم
کس مشکل سے بھیڑ جٹائی
اور تماشہ بھول گئے ہم


یوں گزرے ہیں تیری گلی سے
جیسے رستہ بھول گئے ہم
ایسے پڑے اک موج کے پیچھے
اپنا دریا بھول گئے ہم


بات نکل آئی اک ایسی
باتیں کرنا بھول گئے ہم
مشکل سے تو گھر پہچانا
گھر میں کمرہ بھول گئے ہم