میری بنیاد کو تعمیر سے پہچانا جائے

میری بنیاد کو تعمیر سے پہچانا جائے
مجھ کو عجلت نہیں تاخیر سے پہچانا جائے
میں کئی شکل میں رہتا ہوں بدن پر اپنے
میرا چہرہ مری تحریر سے پہچانا جائے


کوئی سمجھے مری خاموش نگاہوں کی صدا
درد میرا مری تصویر سے پہچانا جائے
آنکھ کا دیکھا ہوا جھوٹ بھی ہو سکتا ہے
خواب کو خواب کی تعبیر سے پہچانا جائے


میں نے پانی کے لئے ریت اڑائی ہے بہت
میری تقدیر کو تدبیر سے پہچانا جائے
میرے کاندھے سے اتارے نہ کوئی میری صلیب
جرم میرا مری تعزیر سے پہچانا جائے


اس اندھیرے میں یہ جھنکار ہے شمعوں کی طرح
یعنی مجھ کو مری زنجیر سے پہچانا جائے
میرا سب کچھ مرے ماضی کے حوالے سے ہے
میرے منگل کو مرے پیر سے پہچانا جائے