میری آنکھوں میں وہ آیا مجھ کو تر کرنے لگا

میری آنکھوں میں وہ آیا مجھ کو تر کرنے لگا
سب علاقے خواب کے زیر و زبر کرنے لگا
ایک دن وہ بھی نکل آیا بھرے بازار سے
رفتہ رفتہ میں بھی تنہائی کو گھر کرنے لگا


یوں ہوا اس نے بس اپنے پاؤں کی جھاڑی تھی دھول
میں تو اس کوچے میں پھر شام و سحر کرنے لگا
کس کے ناخن نے کھرچ ڈالا ہے سارے جسم کو
کون ہے جو میری دیواروں میں در کرنے لگا


بس کسی کو سانس کے قرضے چکانے تھے مجھے
زندگی کرنی نہ تھی مجھ کو مگر کرنے لگا