کسی کے دکھ کو ضرورت تھی پردہ پوشی کی

کسی کے دکھ کو ضرورت تھی پردہ پوشی کی
سو ہم نے سیکھ لی آخر زباں خموشی کی
گلاب جذبوں نے آخر اسے بھی گھیر لیا
کل اس کے ہاتھ میں دیکھی کتاب نوشی کی


میں ایسے شہر گریزاں میں جی رہا ہوں جہاں
نظر ملانا علامت ہے گرم جوشی کی
دکھوں سے کھیلتا رہتا ہے رات دن پاگل
دل تباہ کو عادت ہے عیش کوشی کی


ہمارے واسطے دریا نہ اپنا رخ موڑے
ہماری پیاس کو لت ہے سراب نوشی کی
کہیں لٹیرے سزائیں بھی کاٹتے ہوں گے
ہمارے ہاں تو روایت ہے تاج پوشی کی


ازل سے جبر کو ملتے رہے قصیدہ گو
نئی نہیں ہے کہانی قلم فروشی کی