خود کو اتنا بھی مت بچایا کر

خود کو اتنا بھی مت بچایا کر
بارشیں ہوں تو بھیگ جایا کر
کام لے کچھ حسین ہونٹھوں سے
باتوں باتوں میں مسکرایا کر


درد ہیرا ہے درد موتی ہے
درد آنکھوں سے مت بہایا کر
چاند لا کر کوئی نہیں دے گا
اپنے چہرے سے جگمگایا کر


دھوپ مایوس لوٹ جاتی ہے
چھت پہ کپڑے سکھانے آیا کر
گھر سے باہر نکل ہواؤں میں
زلف سے خوشبوئیں اڑایا کر


کوئی تصویر کوئی افسانا
کچھ نہ کچھ روز ہی بنایا کر
کون کہتا ہے دل ملانے کو
کم سے کم ہاتھ تو ملایا کر