خود اپنے واسطے کیا کیا سخن بناتے ہیں

خود اپنے واسطے کیا کیا سخن بناتے ہیں
کسی کی زلف کو جب پرشکن بناتے ہیں
غزال شام و سحر یوں ہی رم کئے جائیں
ہم اپنے سینے کو دشت ختن بناتے ہیں


اسی کی خاک کے ہم بھی بنے ہوئے ہیں میاں
یہ چاک ہے چلو اس کا بدن بناتے ہیں
یہ لوگ بھاگے ہوئے ہیں ترے وصال سے کیا
جو تیرے ہجر کو اپنا وطن بناتے ہیں


ہمیں پہ پڑتی ہیں ان آئنوں کی بوچھاریں
تو ہم بھی ان کے لئے بانکپن بناتے ہیں
تمام عمر کی آشفتگیٔ جاں کے عوض
کسی کے لمس کو اپنا کفن بناتے ہیں