جو بجھ گیا اسی منظر پہ رکھ کے آیا ہوں

جو بجھ گیا اسی منظر پہ رکھ کے آیا ہوں
میں سب اثاثۂ دل گھر پہ رکھ کے آیا ہوں
بتا میں کیا کروں اب اے مری تہی دستی
کہ جتنے خواب تھے بستر پہ رکھ کے آیا ہوں


جو لے گئی اسے موج فنا تو حیرت کیا
میں اپنا جسم سمندر پہ رکھ کے آیا ہوں
ہرا بھرا ہوں بہاروں کے زخم کھاتے ہوئے
ان انگلیوں کو گل تر پہ رکھ کے آیا ہوں


یہ میں نہیں مری پرچھائیں ہے ترے آگے
کہ اپنا آپ تو میں گھر پہ رکھ کے آیا ہوں
بہت نڈھال ہوئی ہے تھکن سے روح مری
میں اپنی خاک بدن سر پہ رکھ کے آیا ہوں