جیون میں نقصان گھٹایا جا سکتا ہے

جیون میں نقصان گھٹایا جا سکتا ہے
بند گلی سے واپس آیا جا سکتا ہے
دھیان میں رہتی ہیں دو چنچل سی آنکھیں
دھیان کا کیا ہے دھیان بٹایا جا سکتا ہے


تارے وارے تو سب توڑ کے لاتے ہیں
آپ کہیں تو چاند بجھایا جا سکتا ہے
اتنی دیر ہی دل کو ڈھارس رہتی ہے
جب تک ان کے پیچھے سایہ جا سکتا ہے


ترک تعلق پر جب دل آمادہ ہو
کوئی بھی الزام لگایا جا سکتا ہے
فاش کریں گے راز یہ پلکوں کے درباں
کب تک دل کا حال چھپایا جا سکتا ہے


جیب میں ہیں کچھ کھوٹے بے قیمت سکے
عشق میں کتنا دام کمایا جا سکتا ہے