جہاں ہے چھت مری در بھی وہیں نکالتا ہوں

جہاں ہے چھت مری در بھی وہیں نکالتا ہوں
میں اپنے قدموں سے اپنی زمیں نکالتا ہوں
کھڑی ہے پھر کوئی دیوار میرے رستے میں
لہولہان میں پھر سے جبیں نکالتا ہوں


یہ سانپ میرے گلے سے لپٹنے لگتے ہیں
میں اپنے کرتے سے جب آستیں نکالتا ہوں
زمانہ ہو گیا تو نے جسے گرایا تھا
میں اس مکان سے اب تک مکیں نکالتا ہوں


ذلیل کر مجھے لیکن بہت ذلیل نہ کر
یہ زہر میں بھی تو جا کر کہیں نکالتا ہوں
اے بمبئی میں تجھے وارتا ہوں تجھ پر ہی
جو تو نے مجھ کو دیا ہے یہیں نکالتا ہوں


ندی بھی آج اکیلی ہی بہنا چاہتی ہے
تو آج میں بھی یہ کشتی نہیں نکالتا ہوں