جب سے کوئی مرا ہم سفر ہو گیا

جب سے کوئی مرا ہم سفر ہو گیا
زندگی کا سفر معتبر ہو گیا
معتبر ہو کے نا معتبر ہو گیا
کس کی چاہت میں میں دربدر ہو گیا


تم نے آنے کی زحمت گوارا جو کی
مثل فردوس کے میرا گھر ہو گیا
مشکلیں جس قدر راستوں کی بڑھیں
اور آساں ہمارا سفر ہو گیا


جس پہ بھی ہو گیا اس نظر کا کرم
اپنی ہی ذات سے بے خبر ہو گیا
مجھ کو دیکھا ہے اس نے کس انداز سے
دل میں پیوست تیر نظر ہو گیا


قافلے کا ہر اک فرد ہے منتشر
غم نہ جانے کہاں راہبر ہو گیا
جب سے رضواںؔ ہوا صاحب سیم و زر
اس کا جو عیب تھا وہ ہنر ہو گیا