جب پھیر کر نگاہ ہر اپنا پرایا جائے

جب پھیر کر نگاہ ہر اپنا پرایا جائے
مشکل یہ ہے کہ ایسے میں کون آزمایا جائے
ہم آگ سے ڈرائے ہوئے لوگ ہیں ہمیں
اک مہرباں ندی کے کنارے بسایا جائے


ہاں تم وفا پرست ہو بھوکا ہوس کا میں
قسمیں نہ کھائی جائیں مجھے کچھ کھلایا جائے
بیمار سے تو پوچھیے اس کو ہے کس کا روگ
چارہ گری کے واسطے کس کو بلایا جائے


دونوں ہی اپنی کشتیاں ضد میں جلا چکے
بہتر ہے ایسے عشق کو اب بھول جایا جائے
آنا نہیں ہے جس کو نہیں آئے گا کبھی
آنکھیں بچھائی جائیں کہ اب دل جلایا جائے