اتنا اپنا ہو جاتا ہوں

اتنا اپنا ہو جاتا ہوں
چادر تکیہ ہو جاتا ہوں
تجھ کو کمانے کے چکر میں
تیرا خسارہ ہو جاتا ہوں


بازاروں کی چمک دمک میں
اور پرانا ہو جاتا ہوں
جس کی پیٹھ ہو میری جانب
اس کا سایہ ہو جاتا ہوں


کھونے تک تو ٹھیک ہے لیکن
ڈھونڈھنے والا ہو جاتا ہوں
سچ کی شکل بدل جاتی ہے
اور میں جھوٹا ہو جاتا ہوں


خود ہی تماشہ کرتے کرتے
محو تماشا ہو جاتا ہوں
لگتا یہ ہے مر جاؤں گا
لیکن اچھا ہو جاتا ہوں