عشق دل میں کئی جہانوں کا

عشق دل میں کئی جہانوں کا
میں طلب گار ہوں زمانوں کا
خواہشوں کو اڑان بھرنا ہے
ختم ہے کھیل آسمانوں کا


لفظ کاٹے گئے اگائے گئے
کیا بھلا ہو گیا کسانوں کا
تم نے مالک بنا دیا خوش باش
جسم کے بے بہا خزانوں کا


موت نقشہ بنائے بیٹھی ہے
شہر کے آخری مکانوں کا
دیر تک نغمگی برستی رہی
تھم گیا سلسلہ اذانوں کا


رات میں آپ اور خاموشی
وقت ہے آخری اڑانوں کا
دوستوں کو مرے پتہ تو ہے
دشمنوں کے سبھی ٹھکانوں کا