حق بیانی کی جو ہمت ہوگی

حق بیانی کی جو ہمت ہوگی
تیرے جینے کی وہ طاقت ہوگی
جب کھڑی سر پہ مصیبت ہوگی
کیسے پگڑی کی حفاظت ہوگی


مجھ کو لگتا تھا سبھی اپنے ہیں
کب یہ سوچا تھا بغاوت ہوگی
کچھ تو اپنے پہ بھروسہ رکھو
جا بہ جا کس کی عنایت ہوگی


مجھ سے بہتر تو نہیں ہے لیکن
ہر جگہ اس کی ہی عزت ہوگی
سچ کی آنکھوں میں تو آنسو ہوں گے
جھوٹ کہہ کر ہی جو برکت ہوگی


وہ تو دیکھیں گے کرشمہ پہلے
پھر نظرؔ ان سے عبادت ہوگی