اک چراغ اور اجالے میں نہ رکھا جائے

اک چراغ اور اجالے میں نہ رکھا جائے
ہم کو انصاف کے دھوکے میں نہ رکھا جائے
مجھ کو جس شخص کا نشہ ہے اسے ڈھونڈھ کے لاؤ
مجھ کو ان سانپوں کے نرغے میں نہ رکھا جائے


اک حقیقت سے مجھے پردہ اٹھانا ہے سو اب
میرے کردار کو قصے میں نہ رکھا جائے
لوگ بیتاب ہیں دنیا کو جلانے کے لئے
اس قدر سوز بھی باجے میں نہ رکھا جائے


ہم سے لفظوں میں نہ کی جائے گی معنی کی تلاش
حسن اتنا ہے تو پردے میں نہ رکھا جائے