وار پر وار کر رہا ہوں میں

وار پر وار کر رہا ہوں میں
کچھ زیادہ ہی ڈر گیا ہوں میں
کوئی مجبور ہی گزرتا ہے
ایسا ویران راستہ ہوں میں


اف اداسی یہ میری آنکھوں کی
کس قدر جھوٹ بولتا ہوں میں
یہ تو مجھ پر تری نہیں سے کھلا
کتنا آسان فیصلہ ہوں میں


یار سب اٹھ کے جا چکے لیکن
اپنے سر سے نہیں ٹلا ہوں میں
آنکھ کھلنے سے دفن ہونے تک
جانے کس کس کا مسئلہ ہوں میں


وقت کی گہری کھائی ہے نیچے
اور کنارے ہی پہ کھڑا ہوں میں