چمک جو اب کے بڑھی ہے سراب میں کچھ اور

چمک جو اب کے بڑھی ہے سراب میں کچھ اور
اضافہ ہونا ہے شاید عذاب میں کچھ اور
مزاج خوشبو کا میری سمجھ سے باہر ہے
وہ ہر سنگار میں کچھ ہے گلاب میں کچھ اور


ہماری نسل محبت کی بات کیا جانے
ہمیں پڑھایا گیا ہے نصاب میں کچھ اور
جو زرد پتے ملے ہیں وہی غنیمت ہیں
کہو ہوا سے کہ دیکھے نہ خواب میں کچھ اور


وہ میرے نام اک اک سانس کرنے والا تھا
لکھا ہوا ہے مگر انتساب میں کچھ اور