بپھر اٹھا زباں سے جوں ہی نکلی بات بوسے کی

بپھر اٹھا زباں سے جوں ہی نکلی بات بوسے کی
ادھر قلت محبت کی ادھر افراط بوسے کی
میں جس کی سلطنت میں کاسہ برداری پہ راضی تھا
اسی شہزادی نے جی بھر کے دی خیرات بوسے کی


معافی کا تصور ہی نہیں اس کی شریعت میں
کل اس نے انتقاماً مجھ پہ کی برسات بوسے کی
زباں کا گرم بوسہ سیر جنت کی کرا لایا
زمیں والو تمہیں معلوم کیا اوقات بوسے کی


لبوں کے دونوں مصرعے لب سے موزوں کر کے دیکھے ہیں
سمجھ میں یوں نہیں آئی ہیں معروضات بوسے کی
تو اے حسن ازل تجھ سے اجازت چاہتا ہوں میں
اجازت چاہتے ہیں اب مرے جذبات بوسے کی


لبوں پر آخری اک مہر لگ جائے تو سو جاؤں
وگرنہ ختم ہوگی ہی نہیں یہ بات بوسے کی