بیچ بچاؤ کرنے باہر جایا جائے

بیچ بچاؤ کرنے باہر جایا جائے
دیواروں سے کب تک جھگڑا دیکھا جائے
اک میں ہوں بس عام سا قیدی کیا میری
اک وہ ہے جو تیرے ہاتھوں پکڑا جائے


ساتھ سفر کرنے میں کوئی حرج نہیں ہے
لیکن منظر اپنا اپنا دیکھا جائے
چارہ گر بھی تو ہے میرا قاتل بھی تو
پہلے تیرے کس چہرے کو رویا جائے


سب سے زیادہ اترائے جو عشق پہ اپنے
اس کو دنیا دار بنا کر مارا جائے
صحرا کا وارث ہونا تو ٹھیک ہے لیکن
اس کمرے کو کس کے بھروسے چھوڑا جائے