بارہا خود کو بدلنے کا ارادہ کر کے

بارہا خود کو بدلنے کا ارادہ کر کے
یار میں تھک گیا یہ کام زیادہ کر کے
اپنے رہنے کی جگہ بھی نہ مجھے مل پائی
میں نے دیکھا ہے بہت خود کو کشادہ کر کے


تتلیاں اڑ گئیں لوٹا کے محبت میری
میں نے بھی چھوڑ دیا رنگوں کو سادہ کر کے
تیرے نہ ہونے سے کل رات اندھیرا تھا بہت
چاند بھی نکلا تھا بادل کو لبادہ کر کے


اس نے پیمان وفا جان لیا ملنے کو
میں کب آیا تھا ادھر کوئی ارادہ کر کے
اک بڑا معرکہ یوں سر ہوا آسانی سے
شاہ کو کاٹ دیا میں نے پیادہ کر کے