برف پگھلے کہ ذرا راستہ ہونے لگ جائے

برف پگھلے کہ ذرا راستہ ہونے لگ جائے
دھوپ مل کر مرے احساس سے رونے لگ جائے
کوئی منظر کوئی تصویر بنے آنکھوں میں
کوئی بادل مری دیوار بھگونے لگ جائے


دل کی دھڑکن بھی سنائی نہیں دیتی اب کے
تیری یاد آئے کوئی چیز چبھونے لگ جائے
ایسی سردی ہے کہ اس بار مرے ہاتھوں سے
ڈر رہا ہوں کہ ترا لمس نہ کھونے لگ جائے


یا تو اب ختم ہو بہتے ہوئے پانی کا سفر
یا کوئی موج مری ناؤ ڈبونے لگ جائے