بدن چراغ نہیں ہیں محبتیں اپنی

بدن چراغ نہیں ہیں محبتیں اپنی
مگر یہ لو کو بڑھاتی ضرورتیں اپنی
تمام حق کے طرفدار چاروں خانے چت
کوئی سنبھال نہ پایا صداقتیں اپنی


بدل نہ لیں کہیں رستہ یہ آگ کی لپٹیں
ہمیں ہی راکھ نہ کر دیں یہ نفرتیں اپنی
اب اس سے روبرو ہونے میں کچھ نہیں رکھا
بلا کے نقش بناتی ہیں وحشتیں اپنی


سمیٹ اپنے ستاروں کو آسماں والے
بجھا کے چھوڑ گئیں جن کو حسرتیں اپنی
کدھر سے آتی ہے جانے یہ خواب ناک صدا
تو کم نہ ہوں گی کبھی کیا مسافتیں اپنی